A Deputación Provincial de Pontevedra ven de publicar no b.o.p. do 1 de Xullo a Convocatoria para a selección de comercios retallistas da provincia de Pontevedra interesados en participar no Programa de Diagnósticos Comerciais e Asesoramento Individualizado en Visual Merchandising. Este programa está encadrado no "Plan á túa medida", podedes descargar o tríptico o final deste artigo.

1. OBXECTO

Convocatoria para a selección de pequenos/as comerciantes da provincia, para ofrecerlles a oportunidade de recibir un asesoramento personalizado e presencial en Visual Merchandising adaptado ás necesidades concretas dos seus negocios. É dicir, facer unha análise sobre a imaxen da marca e do produto de cada retallista en particular.

2. BENEFICIARIOS

Comerciantes retallistas que desenvolvan a súa actividade comercial na provincia de Pontevedra.

3. LUGAR E PRAZOS DE PRESENTACIÓN DE SOLICITUDES

As solicitudes presentaranse no Rexistro Xeral da Deputación de luns a venres en horario de 8:30 a 14:30 e de 17:00 a 19:00, no Rexistro da Sede de Vigo de luns a venres de 9:00 a 13:00 horas ou por calquera dos procedementos establecidos no art. 38.4 da Lei 30/1992, de 26 de novembro, de Réxime Xurídico das administracións e do Procedemento Administrativo Común.

O prazo de presentación das solicitudes será de 15 días naturais contados a partir do día seguinte ao da publicación do anuncio da presente convocatoria no Boletín Oficial da Provincia de Pontevedra.

Se o último día de presentación de solicitudes coincidira en domingo ou festivo, prorrogarase o prazo ata o primeiro día hábil seguinte. O dito prazo poderá ampliarse 5 días máis, no caso de que no prazo estipulado non se cubrisen as 20 prazas.

As inscricións deberán formularse mediante solicitude asinada polo representante legal de cada comercio, segundo o modelo oficial do Anexo 1.

Cada comercio só poderá presentar unha única solicitude para esta convocatoria. A inscrición nesta convocatoria implica a completa aceptación das súas bases.

Podedes atopar o documento íntegro e as bases necesarias para participar adxuntas a este documento.